ގެދޮރުވެރިޔާ ސްކީމް ފްލެޓު މައްސަލަ މަޑުޖައްސާލަން ހައިކޯޓުން އަމުރުކޮށްފި

ގެދޮރުވެރިޔާ ބޯހިޔާވަހިކަމުގެ ސްކީމްގެ ދަށުން ފްލެޓު ލިބިފައިވާ މައްސަލައެއްގައި ސިވިލް ކޯޓުގައި ހިނގަމުންދާ ޝަރީއަތް މަޑުޖައްސާލުމަށް ހައިކޯޓުން ވަގުތީ އަމުރެއް ނެރެފި އެވެ. މި އަމުރު ނެރެފައިވަނީ ފަހި ދިރިއުޅުން ކޯޕަރޭޝަން (އެފްޑީސީ) އާއި މިނިސްޓްރީ އޮފް ހައުސިން، ލޭންޑް އެންޑް އާބަން ޑިވެލޮޕްމަންޓާ ދެކޮޅަށެވެ. މި މައްސަލައަކީ ނިމިދިޔަ ސަރުކާރުގެ ގެދޮރުވެރިޔާ ސްކީމްގެ ދަށުން ޝަރުތު ހަމަވެ، ފްލެޓު ލިބޭނެކަމުގެ ލިޔުން ލިބި، އެއްބަސްވުމުގައި ސޮއިވެސް ކޮށްފައިވާ މީހެއްގެ ފްލެޓު މި ސަރުކާރުން އަތުލުމުން ހުށަހެޅި މައްސަލައެކެވެ. ހައިކޯޓުގެ އަމުރުގައި ބުނެފައިވަނީ، ސިވިލް ކޯޓުގެ ޝަރީއަތް ކުރިއަށް ގެންދާ ނަމަ ހައިކޯޓަށް ހުށަހަޅާފައިވާ އިސްތިއުނާފުގެ މަގުސަދު ގެއްލުމުގެ ފުރުސަތު އޮތް ކަމަށެވެ.