މުވައްޒަފުން ކަނޑާލުމާ ބެހޭގޮތުން އެމްޑީޕީން ދައްކަނީ ހަގީގަތެއް ނެތް ވާހަކަތަކެއް: މުންދު

ސަރުކާރު ހިއްސާވާ ކުންފުނިތަކުން މުވައްޒަފުން ކަނޑާލުމާ ބެހޭގޮތުން އިދިކޮޅު އެމްޑީޕީން ދައްކަނީ ހަގީގަތެއް ނެތް ވާހަކަތަކެއް ކަމަށް ސަރުކާރުގެ ތަރުޖަމާން މުހައްމަދު ހުސެއިން ޝަރީފް (މުންދު) ވިދާޅުވެއްޖެ އެވެ. އެމްޑީޕީން ސައްހަ މައުލޫމާތަށް ބިނާކޮށް ވާހަކަދެއްކުމުގެ ބަދަލުގައި އަބަދުވެސް މަސައްކަތް ކުރަނީ އާއްމުން ޖަޒުބާތުގައި ޖެއްސުމަށް ކަމަށް މުންދު ވިދާޅުވި އެވެ. ސަރުކާރުގެ ބައެއް ކުންފުނިތަކުގެ ހިންގުން ހަރުދަނާ ކުރުމަށާއި އޮޕަރޭޝަނަށް ބޭނުންވާ މިންވަރަށް މުވައްޒަފުން ބޭތިއްބުމަށް ފަށާފައިވާ މަސައްކަތަކީ އާއްމުންނަށް އެކަށީގެންވާ ޚިދުމަތެއް ފޯރުކޮށްދިނުމުގެ މަގުސަދުގައި ކުރާ ކަމެއް ކަމަށް އޭނާ ވިދާޅުވި އެވެ.