ބިދޭސީންނަށް ރަށްވެހިކަމާއި ބިންވިއްކުން: ބޮޑު ނުރައްކަލެއް

މާލީ ދަތިކަމުގެ ސަބަބުން ބިދޭސީންނަށް ރަށްވެހިކަމާއި ބިންވިއްކުމުގެ ފުރުސަތު ހުޅުވާލުމުގެ ކުރިން ރައްޔިތުންގެ ބޯހިޔާވަހިކަމުގެ މަޝްރޫއުތަކަށް ހަރަދުކުރާނެ ފައިސާ ނެތް ހާލަތެއްގައި ކޮންމެ ދިވެއްސަކުވެސް އަމިއްލަ ނަފްސާ ސުވާލުކޮށްލަން ޖެހެއެވެ. ރާއްޖޭގެ ނާޒުކު އިގުތިސާދަށް މާލީ ނުރައްކަލާއި ބޭރު ދުނިޔޭގެ ހާލަތްތަކުން ކުރާ ނުރަނގަޅު އަސަރުތައް ބޮޑުވެފައިވާ ދަނޑިވަޅެއްގައި، ރާއްޖެ އޮތީ ދަރަނި ނުދެއްކިދިޔުމުގެ ބޮޑު ނުރައްކަލެއްގެ ތެރޭގަ އެވެ. ބޭރުގެ އިންވެސްޓަރުން ރާއްޖެ ގެނައުމުގެ އެދުން ބޮޑުވެފައިވާ މި ހާލަތުގައިވެސް، ބޯހިޔާވަހިކަމުގެ ނަމުގައި މާލެއާ ކައިރިން ތަފާތު ހަތަރު ދިމާލަކުން ބިންހިއްކުމުގެ ބޮޑެތި މަޝްރޫޢުތަކެއް ވަނީ ފަށާފައެވެ. ގާނޫނީ ބަދަލުތަކާއި އިދާރީ އޮނިގަނޑު ބައްޓަންކުރުމުގެ ތެރެއިން ބޭރުގެ ރައުސްމާލަށް ރަށްވެހި ތަރައްގީގެ މަޝްރޫޢުތައް ހުޅުވައިލަމުންދާއިރު، ގައުމީ މަސްލަހަތުގެ ކުރިއަށް ބިންވިއްކުން ފޮރިން އިންވެސްޓްމަންޓް މަތިކުރުމަށް ގާނޫނު ބައްޓަންކުރުމުގެ ބޮޑު ނުރައްކަލެއް އެބައޮތެވެ.