ސަރުކާރުގެ އިސްރާފު ހުއްޓާލައި ސިޔާސީ މުވައްޒަފުން ވަކި ކުރުމަށް ފަހު އާދައިގެ މުވައްޒަފުން ވަކި ކުރަން ޖެހޭނީ: ޝަމްހީދު

ހުޅުމާލޭ ދެކުނު ދާއިރާގެ މެންބަރު ޑރ. އަޙުމަދު ޝަމްހީދު ވިދާޅުވީ ސަރުކާރުގެ ޚަރަދު ކުޑަ ކުރުމުގެ ނަމުގައި އާދައިގެ މުވައްޒަފުން ވަކި ކުރަން ޖެހޭނީ، ސަރުކާރުން ކުރަމުން އަންނަ ބޭކާރު ޚަރަދުތައް ހުއްޓާލައި ސިޔާސީ މުވައްޒަފުން ވަކި ކުރުމަށް ފަހުގައި ކަމަށެވެ. މިހާރު ވަޒީފާ އިން ވަކި ކުރަމުން އަންނަ މީހުންގެ ތެރޭގައި ގިނައީ އެމްޑީޕީގެ މެންބަރުން ކަމަށާއި، ކުރިއަށް އޮތް ތަނުގައި އިތުރު ރައްޔިތުންނާއި ޕީއެންސީގެ މެންބަރުން ވެސް ވަކި ކުރާނެ ކަމަށް ޝަމްހީދު ވިދާޅުވި އެވެ. ޚަރަދު ކުޑަ ކުރުމަށް ސަރުކާރުން އެއްވެސް ކަމެއް ކޮށްފައި ނުވާ ކަމަށާއި، ބޭކާރު މަޝްރޫއެއް ވެސް ހުއްޓާލާފައި ނުވާ ކަމަށް ޝަމްހީދު ވިދާޅުވި އެވެ. ކޮންމެ މަހަކު ސަރުކާރުން ބާއްވާ އެކި އިވެންޓުތަަކަށް މިލިއަނުން ޚަރަދު ކުރަމުން އަންނަ ކަމަށާއި، އެކަމުން ރައްޔިތުންނަށް ވާ އެއްވެސް ފައިދާއެއް ނެތް ކަމަށް ޝަމްހީދު ވިދާޅުވި އެވެ.