ކޮރަޕްޝަން: ނުރައްކާތެރިކަމާއި ނަސޭހަތް

މިއަދުގެ ހުކުރު ޚުތުބާގައި ކޮރަޕްޝަން އަދި ރިޝްވަތުގެ ނުރައްކާތެރިކަމާ މެދު މުޖުތަމަޢު ހޭލުންތެރިކުރުވުމަށް ގިނަގުނަ ނަސޭހަތްތަކެއް ދީފައެވެ. ނަހަމަ ގޮތުގައި ލިބިގަންނަ މަންފާއެއްގެ މައްޗަށް ދިރިއުޅުން ބިނާކުރާ މީހާއަކީ އީމާންކަމުގެ ނޫރު ކަނިވެ، ޙަޔާތް އަބާއްޖަވެރިވެ، ނަރަކައިގެ އަލިފާނަށް ހުށަހެޅޭނޭ މީހެއްކަމަށް ޚުތުބާގައި ބުނެފައިވެއެވެ. ކޮރަޕްޝަން ފެތުރުމުގެ ސަބަބުން އިޖުތިމާޢީ ޢަދުލުވެރިކަން ގެއްލި، ފަޤީރުކަން އިތުރުވެ، އިޤުތިޞާދުގެ ތަނބުތައް ފުނޑުފުނޑުވާކަން ފާހަގަކުރައްވަމުން، މީސްތަކުންގެ މުދާ ބާޠިލު ގޮތުގައި ނުކެއުމަށް ޚުތުބާގައި ނަޞޭޙަތްތެރިވިއެވެ.