ކަސްޓަމްސްގެ ޚިދުމަތްތައް ޑިޖިޓަލައިޒް ކުރެވި، ބޯޑަރު ރައްކާތެރިކަމާއެކު ބެލެހެއްޓޭނެ: މިނިސްޓަރު

ހޯމް މިނިސްޓަރު އަލީ އިހުސާން ވިދާޅުވީ ކުރިއަށް އޮތްތަނުގައި ކަސްޓަމްސްގެ ޚިދުމަތްތައް އިތުރަށް ޑިޖިޓަލައިޒް ކުރެވި، ބޯޑަރުތައް ރައްކާތެރިކަމާއެކު ބެލެހެއްޓުމަށް ކަމަރު ބަންނަވާނެ ކަމަށެވެ. މިނިސްޓަރު ވިދާޅުވީ، ރާއްޖޭގެ ދޮރޯށިތައް ބެލެހެއްޓުމާއި ވިޔަފާރިތަކަށް ފަހި މާހައުލެއް ގާއިމުކޮށްދިނުމުގެ އިތުރުން، ދައުލަތަށް ވަންނަ އާމްދަނީގެ ބޮޑު ހިއްސާއެއް ރައްކާތެރިކަމާއެކު ބެލެހެއްޓުމުގެ ޒިންމާ ކަސްޓަމްސްގެ މުވައްޒަފުން އަދާކުރަމުންދަނީ ވަރަށް އިހްލާސްތެރިކަމާއެކު ކަމަށެވެ. މަސްތުވާތަކެއްޗާއި މަނާކޮށްފައިވާ ތަކެތި ރާއްޖެއަށް އެތެރެވުން ހުއްޓުވުމުގައި ކަސްޓަމްސްއިން ފާއިތުވި ދުވަސްތަކުގައި ބޮޑެތި ކާމިޔާބީތަކެއް ހޯދާފައިވާ ކަމަށް މިނިސްޓަރު އިހުސާން ވިދާޅުވި އެވެ. މި ސަރުކާރު އައިފަހުން، ބޯޑަރުން މަސްތުވާތަކެތި އަތުލައިގަތުމާއި، އާންމު ސިއްހަތަށް ގެއްލުންދޭ ވޭޕް ފަދަ މަނާކޮށްފައިވާ ތަކެތި އެތެރެވުން ހުއްޓުވުމުގައި ފާއިތުވި ދެ އަހަރާއި ބައިގެ ތެރޭގައި ފާހަގަކޮށްލެވޭ ފަދަ ކުރިއެރުންތަކެއް ހޯދިފައިވާ ކަމަށް ވެސް މިނިސްޓަރު ވިދާޅުވި އެވެ.