ކުވެއިތު އެއާޕޯޓުގެ ފްލައިޓްތައް ބަންދުކޮށްފި

އީރާނުން ދެމުންދާ ހަމަލާތަކާ ގުޅިގެން ކުވެއިތު އިންޓަނޭޝަނަލް އެއާޕޯޓަށް ފްލައިޓްތައް ޖެއްސުމާއި ފުރުން ވަގުތީ ގޮތުން މެދުކަނޑާލާފައިވާ ކަމަށް ކުވެއިތު އެއާވޭސްއިން ބުނެފި އެވެ. ސޯޝަލް މީޑިއާގައި ފެތުރިފައިވާ ފުޓޭޖަކުން ކުވެއިތުގެ ވައިގެ ބަނދަރަށް ހަމަލާއެއް އަމާޒުވި ކަމަށް ފެންނަ ނަމަވެސް، ރަސްމީ އެއްވެސް ފަރާތަކުން މިކަން ކަށަވަރުކޮށްދީފައެއް ނުވެ އެވެ. ކުވެއިތުގެ އަސްކަރިއްޔާއިން ބުނެފައިވަނީ، އީރާނުން ދެމުންދާ ނުރައްކާތެރި ހަމަލާތަކާ ގުޅިގެން، އެ ގައުމަށް އަމާޒުވަމުންދާ މިސައިލްތަކާއި ޑްރޯންތަކަށް ކުވެއިތުގެ އެއާ ޑިފެންސް ސިސްޓަމްތަކުން ރައްދު ހަމަލާދެމުންދާ ކަމަށެވެ.