ޑޮލަރުގެ ކަޅު ބާޒާރާ ގުޅިގެން ގަވަރުނަރު ބައްދަލު ކުރަން އެދިއްޖެ

ބޭރު ފައިސާގެ ބާޒާރަށް އަންނަ ބަދަލުތަކާ ގުޅިގެން މޯލްޑިވްސް މަނިޓަރީ އޮތޯރިޓީގެ ގަވަރުނަރު އަހުމަދު މުނައްވަރު، އެމްޑީޕީގެ ޕާލިމަންޓްރީ ގްރޫޕާ ބައްދަލު ކުރެއްވުމަށް ރައްޔިތުންގެ މަޖިލީހުގެ މެންބަރު މުހައްމަދު އިބްރާހިމް (ކުޑޫ) ހުށަހަޅުއްވައިފި އެވެ. ބޭރު ފައިސާއާ ބެހޭ ގާނޫނަށް އަމަލުކުރަން ފެށި ނަމަވެސް ނިޒާމީ މައްސަލަތަކުގެ ސަބަބުން ބޭރު ފައިސާގެ ކަޅު ބާޒާރެއް އުފެދިފައިވާ ކަން ފާހަގަކުރެވޭ ކަމަށް މެންބަރު ވިދާޅުވި އެވެ. މި މައްސަލައިގެ ސަބަބުން ރައްޔިތުންނަށާ ދިވެހި އިގްތިސާދަށް ކުރިމަތިވާ ގޮންޖެހުންތަކާ ގުޅޭ ގޮތުން މަޝްވަރާ ކުރުމަށް އެންމެ އަވަސް ފުރުސަތެއްގައި ބައްދަލުވުމެއް ހަމަޖައްސަވައި ދެއްވުމަށް އެދިވަޑައިގަންނަވާ ކަމަށް ވެސް މެންބަރު ވިދާޅުވި އެވެ.