ޚުތުބާގައި އަމާނާތްތެރިކަމުގެ މައްޗަށް ބާރުއަޅައިފި

މިއަދުގެ ޚުތުބާގައި ބުނެފައިވަނީ ދައުލަތާއި ޢާންމު ރައްޔިތުންގެ މުދަލާއި ފައިސާއަކީ ބޮޑުވެގެންވާ އަމާނާތެއް ކަމަށެވެ. ވަޒީފާގެ މަސްއޫލިއްޔަތުތައް ފުރިހަމައަށް އަދާކުރުމާއި ވަގުތަށް ފަރުވާތެރިވުމަކީ ވެސް އަމާނާތްތެރިކަމުގެ ތެރެއިންވާ ކަމެކެވެ. މީގެ އިތުރަށް، މީސްތަކުން އަހަރެމެންނަށް އިތުބާރުކޮށްފައި ކިޔައިދޭ ވާހަކަތަކަކީ ވެސް އަމާނާތެއް ކަމަށާއި ވަށައިގެންވާ ޤުދުރަތީ ވެށްޓާއި ދިރޭ ތަކެއްޗަކީ ވެސް އަންނާން އޮތް ޖީލުތަކަށް ޓަކައި ރައްކާތެރިކުރުމަށް الله ސުބްޙާނަހޫ ވަތަޢާލާ ޙަވާލުކުރައްވާފައިވާ ބޮޑުވެގެންވާ އަމާނާތެއް ކަމަށް ޚުޠުބާގައި ހަނދާންކޮށްދީފައިވެއެވެ. އަމާނާތްތަކަށް ރައްކާތެރިވުމުން މުޖުތަމަޢުގައި އަމާންކަމާއި ޞުލްޙަވެރިކަން ޢާންމުވާ ކަމަށާއި އެއާ ޚިލާފަށް ޚިޔާނާތްތެރިވުމަކީ އަނިޔާވެރިކަމާއި ކޮރަޕްޝަން ފެތުރި ދުނިޔެއާއި އާޚިރަތުގައި ގެއްލުން ލިބޭނެ ކަމެއް ކަމުގައި ހަނދާންކޮށްދީފައިވެއެވެ.