ފަނޑިޔާރުންގެ އަދުލުވެރިކަން ނެތްކަން ފެނުނީމާ މަރުގެ ހުކުމާ ދެކޮޅު: ޔާމީން

ކުރީގެ ރައީސް އަބްދުﷲ ޔާމީން އަބްދުލްގައްޔޫމް ވިދާޅުވީ ރާއްޖޭގައި މިހާރު ތިބި ފަނޑިޔާރުންގެ އަދުލުވެރިކަމެއް ނެތް ކަމަށާއި މަރުގެ ހުކުމް އިއްވަން އެ މީހުންނާ ހަވާލުކުރަން ހެޔޮނުވާނެ ކަމަށެވެ. ކުރިން މަރުގެ ހުކުމް ގާއިމުކުރަން ތާއީދުކުރެއްވި ނަމަވެސް، ފަނޑިޔާރުންގެ ނުކުޅެދުންތެރިކަން ނުވަތަ އަދުލުވެރިކަން ނެތްކަން ފެނުނީމާ މިހާރު އެކަމާ ދެކޮޅު ކަމަށް ވިދާޅުވި އެވެ. ޔާމީން މިހެން ވިދާޅުވީ އެމަނިކުފާނުގެ މައްޗަށް ދައުވާކުރި މައްސަލަތަކުގައި ފަނޑިޔާރުންނާއި ކުރީގެ ޕްރޮސެކިއުޓާ ޖެނެރަލްގެ އޮފީހުން ކަން ކޮށްފައި ހުރި ގޮތަށް ފާޑުވިދާޅުވުމަށް ފަހު އެވެ.