އުސްގެކޮޅު ސަރުކާރުގެ ބެލުމުގެ ދަށަށް ގެންދަނީ

މާލޭ ސިޓީ ކައުންސިލުން ބަލަހައްޓަމުން އަންނަ އާސާރީ ބިނާއެއް ކަމަށްވާ އުސްގެކޮޅަށް ބަޔަކު ވަދެ ގްރެފިޓީ ކުރަހައި ގެއްލުން ދިން މައްސަލައާ އެކު އެތަން ސަރުކާރުގެ ބެލުމުގެ ދަށަށް ގެންދަން މަސައްކަތްކުރަމުން އަންނަ ކަމަށް ސަރުކާރުގެ ތަރުޖަމާނު މުހައްމަދު ހުސަިއން ޝަރީފު (މުންދު) ވިދާޅުވެއްޖެ އެވެ. އުސްގެކޮޅު ހިމަނައިގެން އިންޓަރެކްޓިވް މިއުޒިއަމެއް އަޅަން ނިންމައި އެތަނުގެ ތަޅުދަނޑި ހަވާލުކުރަން މާލޭ ސިޓީކައުންސިލްގައި އެދުނުތާ ދެ އަހަރު ވެއްޖެ ކަމަށާއި ތަޅުދަނޑި ހަވާލުކުރަން ކައުންސިލުން އެއްބަސް ވެސް ވި ކަމަށް އޭނާ ވިދާޅުވި އެވެ. އެތަން ބެެލެހެއްޓުމާ މިހާރުން މިހާރަށް ހަވާލުވާން ޖެހެނީ ސިޓީ ކައުންސިލަށް އެތަން ނުބެލެހެއްޓޭތީ ކަމަށް ވެސް އޭނާ ވިދާޅުވި އެވެ.