އިންޑިއާ އެފްޓީއޭއަށް ވިޔަފާރިވެރިންގެ ހިޔާލު ހޯދަން ފަށައިފި

އިންޑިއާއާއެކު ގާއިމުކުރުމަށް މަސައްކަތް ކުރަމުންދާ މިނިވަން ވިޔަފާރީގެ އެއްބަސްވުން (އެފްޓީއޭ) އާ ގުޅޭ ގޮތުން ދިވެހި ވިޔަފާރިވެރިންގެ ހިޔާލާއި މަޝްވަރާ ހޯދުމުގެ މަސައްކަތް ސަރުކާރުން ފަށައިފި އެވެ. މި މަސައްކަތުގެ ދަށުން އިކޮނޮމިކް މިނިސްޓްރީން ވަނީ ވިޔަފާރިވެރިންނާ ބައްދަލުކޮށް މަޝްވަރާކުރަން ފަށައިފަ އެވެ. ބައްދަލުވުމުގައި ބައިވެރިވި ވިޔަފާރިވެރިން ވަނީ މި އެއްބަސްވުމުގެ ސަބަބުން ރާއްޖޭގެ އިގްތިސޯދަށާއި ދިވެހި ވިޔަފާރިތަކަށް ކުރިމަތިވެދާނެ ގޮންޖެހުންތަކާ މެދު ގިނަ ސުވާލުތަކެއް އުފައްދާފަ އެވެ. ހާއްސަކޮށް، އިންޑިއާ ފަދަ ބޮޑު މާކެޓެއްގައި ދިވެހި ވިޔަފާރިވެރިންނަށް ފަސޭހަކަމާއެކު ހަރަކާތްތެރިވުމުގެ ފުރުސަތު ހޯދައިދެވޭނެތޯ އާއި ދެ ގައުމުގެ ދެމެދުގައި އޮތް ފުރުސަތުތަކުގެ ހަމަހަމަކަމާ މެދު ކަންބޮޑުވުން ފާޅުކުރި އެވެ.