ރާ ބޮއެގެން ހަމަނުޖެހުން: ހަތަރު މީހަކު ހައްޔަރު

ހުޅުމާލެ 1 ގައި ހުންނަ ގެއެއްގެ ތެރޭ މިއަދު ހެނދުނު އަޑުގަދަކޮށް ހަމަނުޖެހުން ހިންގި ކަމުގެ ރިޕޯޓެއް ލިބިގެން ފުލުހުން ގޮސް، މަސްތުގެ ހާލަތުގައި ތިބި ކަމަށް ބެލެވޭ ހަތަރު ދިވެއްސަކު ހައްޔަރުކޮށްފި އެވެ. ފުލުހުން ބުނީ މިއަދު ހެނދުނު 6:05 ހާއިރު، އެޕާޓްމަންޓެއްގައި ހަމަނުޖެހުމެއް ހިނގައިގެން އުޅޭ ކަމަށް ރިޕޯޓް ލިބިގެން ގޮސް ބެލި އިރު ބަނގުރާ ހުސްކޮށްފައި ހުރި ފުޅިތަކެއް ފެނުނު ކަމަށާއި އެތަނުގައި ހަތަރު ދިވެއްސަކު ތިބި ކަމަށެވެ. އެ މައްސަލައިގައި ހައްޔަރުކޮށްފައިވަނީ އުމުރުން 26 އަހަރުގެ އަންހެނަކާއި 29 އަހަރުގެ އަންހެނަކާއި އުމުރުން 34 އަހަރުގެ ފިރިހެނަކާއި 24 އަހަރުގެ ފިރިހެނެކެވެ.