ބޯހިޔާވަހިކަމުގެ މަޝްރޫޢުތަކަށް ނުފޫޒެއް ނުފޯރުވޭނެ ކަމަށް ރައީސް ވިދާޅުވީ

މި ސަރުކާރުން ހިންގާ ބޯހިޔާވަހިކަމުގެ މަޝްރޫޢުތަކަކީ އެއްވެސް ފަރާތެއްގެ ނުފޫޒެއް ނެތި، އިންސާފުވެރިކަމާއެކު ކުރިއަށްގެންދާނެ މަޝްރޫޢުތަކެއް ކަމުގެ ޔަޤީންކަން ރައީސް ޑރ. މުޙައްމަދު މުޢިއްޒު ދެއްވައިފިއެވެ. ނުފޫޒުގަދަ ފަރާތްތަކުން ބޭނުންވާ މީހުންނަށް ގޯއްޗާއި ފްލެޓް ލިބޭ ޒަމާން ނިމުމަކަށް ގެންނަވާނެ ކަމަށް ރައީސް ވިދާޅުވިއެވެ. މި މަޝްރޫޢުގެ ދަށުން ފްލެޓަށް އެދި 35,900 އަށްވުރެ ގިނަ އެޕްލިކޭޝަން ހުށަހަޅާފައިވާއިރު، ގޯއްޗަށް އެދި 22,000 އަށްވުރެ ގިނަ ފޯމު ވަނީ ހުށަހަޅާފައެވެ. ސަރުކާރުން ވިދާޅުވަނީ މިއަހަރުގެ ތެރޭގައި ގިނަ މަޝްރޫޢުތަކެއްގެ އަމަލީ މަސައްކަތް ފަށައި، ކުރިއަށް އޮތް ދެ އަހަރެއްހާ ދުވަހުގެ ތެރޭގައި މަސައްކަތް ނިމި، އާންމުންނަށް ވަގުތުން ވަދެވޭނެ އިންތިޒާމު ހަމަޖެހިގެންދާނެ ކަމަށެވެ.