ހަނިމާދޫ އެއާޕޯޓަކީ ބޭކާރު ހަރަދެއްގެ ގޮތުގައި ދެއްކުމަށް މަސައްކަތް ކުރަނީ: ކައުންސިލް ރައީސް

ހދ. ހަނިމާދޫ އެއާޕޯޓަކީ ކުރީގެ ސަރުކާރުން ކޮށްފައި އޮތް ބޭކާރު ހަރަދެއްގެ ގޮތުގައި ދެއްކުމަށް ކުރަން ޖެހޭ ހުރިހާ މަސައްކަތްތަކެއް މިހާރު ކުރަމުންދާ ކަމަށް އެރަށު ކައުންސިލްގެ ރައީސް އަލީ އިބްރާހިމް ވިދާޅުވެއްޖެ އެވެ. ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި ހަނިމާދޫ އެއާޕޯޓަކީ ވަރަށް ބޮޑު އިސްކަމެއް ދީގެން ރައްޔިތުން އެދުނު ގޮތަށް ވަކި ޕްލޭނެއްގެ ދަށުން ތަރައްގީ ކޮށްފައިވާ މުހިންމު ތަނެއް ކަމަށް އަލީ ވިދާޅުވި އެވެ. މިސަރުކާރާއެކު އެއާޕޯޓުގެ އާރޯކަމެއް ތަރައްގީއެއް ނުފެންނަ ކަމަށާއި، އެއީ ކުރީ ސަރުކާރުގައި ކޮށްފައިވާ ބޭކާރު ހަރަދެއްގެ ގޮތުގައި ރައްޔިތުންނަށް ދައްކަން ކުރަން ޖެހޭ ހުރިހާ މަސައްކަތެއް މިސަރުކާރުން ކުރަމުންދާ ކަމަށް އޭނާ ވިދާޅުވި އެވެ.