ޢީދު ޚުތުބާގައި އިސްލާމީ ހިންގުމަށް ގޮވާލުން

ބަރަކާތްތެރި އަޟުޙާ ޢީދުގެ އުފާ ފާޅުކުރުމުގައި އިސްލާމީ ޝަރީޢަތުގެ މިންގަނޑުތަކުން ބޭރުނުވުމަށާއި، ޢީދުގެ ނަމުގައި މީހުންނަށް ފުރައްސާރަކުރުމާއި ދީނާ ފުށުއަރާ ކަންކަން ނުކުރުމަށް މިއަދުގެ ޢީދު ޚުތުބާގައި ގޮވާލައިފިއެވެ. ޢީދުގެ ނަމުގައި މީހުންނަށް މަލާމާތްކުރުމާއި، އަންހެނުން ފިރިހެން ހެދުން އެޅުމާއި، ފިރިހެނުން އަންހެން ހެދުން އެޅުމުގެ އިތުރުން ދެޖިންސު މަސްހުނިވެގެން ކުޅިވަރު ކުޅުމަކީ ދުރުހެލިވާންޖެހޭ ކަންކަން ކަމުގައި ޚުތުބާގައި ބުންޏެވެ. މީގެއިތުރުން ޢީދުގެ އެންމެހައި ޙަރަކާތްތައް އިންތިޒާމުކުރާ ފަރާތްތަކުން މާތް اللهއަށް ބިރުވެތިވެ، އިސްލާމްދީނާ ފުށުއަރާ ކަންތައްތަކާއި އެހެން ދީންތަކުގެ ޝިޢާރުތަކާ އެއްގޮތްވާ ކަންކަމުން ދުރުހެލިވުމަކީ ވާޖިބެއްކަން ހަނދާންކޮށްދިނެވެ.