ފަރުދުންގެ ބައިވެރިވުން އިތުރުކުރުމަށް އާ މޮޑެލެއް

ފަތުރުވެރިކަން ފުޅާކުރުމުގައި ރަށްރަށުގެ މުޖުތަމައުތަކުގެ ބޭނުންތަކާއި ޝުއޫރުތަކަށް ރިއާޔަތްކޮށް، އާންމު ފަރުދުންގެ ބައިވެރިވުން އިތުރުކުރުމަށް ޕީޕަލް ސެންޓާޑް ކޮމިއުނިޓީ ޓޫރިޒަމް އެމްޕަވާމަންޓް މޮޑެލް ތައާރަފުކުރުމަށް މިނިސްޓްރީ އޮފް ޓޫރިޒަމް އެންޑް ސިވިލް އެވިއޭޝަނާއި ޔޫއެންއެފްޕީއޭ މޯލްޑިވްސްއާ ދެމެދު ފަހުމުނާމާއެއްގައި ސޮއިކޮށްފިއެވެ. މި މަޝްރޫއުގެ ފުރަތަމަ ފިޔަވަހީގައި ކުރިއަށްދާނީ މެޕިންގެ މަސައްކަތްތައް ކަމަށްވާއިރު މިއީ މުސްތަގުބަލުގައި ކުރިއަށްދާނެ ކެޕޭސިޓީ ބިލްޑިންނާއި އުފެއްދުންތެރިކަމުގެ މަރުހަލާތަކަށް އެޅޭ ބިންގަލެއް ކަމަށް މިނިސްޓްރީން ބުނެއެވެ. މި އެއްބަސްވުމުގެ ދަށުން ބ. ދަރަވަންދުއާއި ދޮންފަނާއި ކިހާދޫގެ އިތުރަށް ކުޑަރިކިލުގައި އަންހެނުންނާއި ޒުވާނުންނާއި އިސްރަށްވެހިންނަށް ބައިވެރިވެވޭ ފަދަ ފަތުރުވެރިކަމުގެ ނިޒާމެއް ބިނާކުރުމަށް މަޝްރޫއެއް ފެށުމަށް ވަނީ ނިންމާފައެވެ.