ތިމާވެށި ހިމާޔަތްކުރުމަށް ގޮވާލައި އިހުތިޖާޖުކޮށްފި

ދުނިޔޭގެ ތިމާވެށި ދުވަސް ފާހަގަކުރުމުގެ ގޮތުން "ވެށީގެ ދިފާއުގައި އެންމެން އެއްވުން" ނަމުގައި ރާއްޖޭގެ ވެށި ހިމާޔަތްކުރުމަށް ގޮވާލައި ޖަމިއްޔާތަކާއި އާންމުން ގުޅިގެން މާލޭގައި އިހުތިޖާޖުކޮށްފި އެވެ. މި އިހުތިޖާޖުގައި ބައިވެރިވި މީހުން ހިފައިގެން ތިބި ބޯޑުގައި ތިމާވެށި ހިމާޔަތްކުރުމަށް ގޮވާލައި ގިނަ ޝުއޫރުތައް ލިޔެފައިވެ އެވެ. 33 ޖަމިއްޔާއަކުން ވަނީ ރާއްޖޭގެ ތިމާވެށި ރައްކާތެރިކުރުމަށް ހުރި ގާނޫނީ އޮނިގަނޑުތައް މުގުރާލައި، ގުދުރަތީ ވަސީލަތްތަކަށް އިއާދަނުކުރެވޭ ފަދަ ބޮޑެތި ގެއްލުންތަކެއް ދެމުންދާތީ އެކަމުގެ ކަންބޮޑުވުން ފާޅުކޮށްފަ އެވެ. މި ބަޔާނުގައި ފާހަގަކޮށްފައިވާ ގޮތުގައި، ތިމާވެށި ރައްކާތެރިކުރާ އެޖެންސީގެ މިނިވަންކަން ނަގާލުމާއި، ހިމާޔަތްކޮށްފައިވާ ސަރަހައްދުތަކުގައި ތިމާވެށްޓަށް ގެއްލުންދެނިވި ކަންކަން ކުރުމަށް ހުއްދަދިނުމާއި، މިޔަރުގެ މަސްވެރިކަން އަލުން ހުޅުވާލުމަކީ ސިޔާސީ ބޭނުމަށްޓަކައި ހިންގާ ތިމާވެށީގެ ގަތުލުއާންމެކެވެ.