ގޮނޑި ގެއްލިއްޖެނަމަ އަލުން ހޯދައިދޭނެ ކަމުގެ ޔަގީންކަން ދޭންޖެހޭ: ސޯލިހު

ކުރީގެ ރައީސް އިބްރާހިމް މުހައްމަދު ސޯލިހު ވިދާޅުވީ، ރައްޔިތުންގެ މަޖިލީހުގެ ގޮނޑި ގެއްލުނަސް އެ ގޮނޑި އަލުން ހޯދައިދޭނެ ކަމުގެ ޔަގީންކަން ދޭ ނަމަ، ޕީއެންސީ ދޫކޮށް ސަރުކާރު ޖަވާބުދާރީ ކުރުވުމުގެ މަސައްކަތް ކުރާނެ ޕީއެންސީގެ މެންބަރުންތަކެއް އެބަތިބި ކަމަށެވެ. އައްޑޫގައި ބޭއްވި "ސޯބެ ޖަލްސާ"ގައި ވާހަކަ ދައްކަވަމުން ރައީސް ސޯލިހު ވަނީ ޕާޓީ ބަދަލުކުރުމުން މަޖިލިސް ގޮނޑި ގެއްލޭ ގާނޫނަށް ގެނެސްފައިވާ ބަދަލަށް ވަރަށް ބޮޑަށް ފާޑު ވިދާޅުވެފަ އެވެ. އަދި މެންބަރުން ތަޅު އަޅުވައިގެން ފަސް އަހަރު ވަންދެން ގެންގުޅުމަކީ މި ސަރުކާރުން ގެނެސްފައިވާ ވަރަށް ނުރަނގަޅު ބަދަލެއް ކަމަށް ވިދާޅުވި އެވެ.