ވެކްސިނާ ދެކޮޅު ވިސްނުންތައް ސިއްހީ ކުރިއެރުންތަކަށް ނުރައްކާ: އެޗްޕީއޭ

އެޗްޕީއޭ އިން ބުނީ ވެކްސިނާ ދެކޮޅު ވިސްނުންތައް އިތުރުވުމަކީ ރާއްޖޭގެ ސިއްހީ ދާއިރާއިން ހޯދި ކުރިއެރުންތައް ފަހަތަށް ޖައްސާލާނެ ފަދަ ނުރައްކާތެރި ކަމެއް ކަމަށެވެ. މައުލޫމާތު ހޯދައި ލިބިގަތުމުގެ ގާނޫނުގެ ދަށުން "މިހާރު"އިން ހުށަހެޅި ސުވާލުތަކަށް އެ އެޖެންސީން ދިން ޖަވާބުގައި ބުނީ ވެކްސިންނާ ދެކޮޅު ވާހަކަތަކަކީ ރާއްޖޭގެ އާއްމު ސިއްހަތު ރައްކާތެރިކުރުމުގައި އެޗްޕީއޭ އަށް ކުރިމަތިވަމުންދާ ވަރަށް ބޮޑު ގޮންޖެހުމެއް ކަމަށެވެ. އޭގެ ސަބަބުން ބެލެނިވެރިންގެ މެދުގައި ބިރުވެރިކަން އުފެދި، ސިއްހީ އިދާރާތަކުން ދޭ އިރުޝާދުތަކަށް އޮންނަ އިތުބާރު އާއްމުންގެ މެދުގައި ކުޑަވާ ކަމަށް ވެސް ބުންޏެވެ. އެކަންކަމާ އެކު، ރާއްޖެއިން ނައްތާލާފައިވާ ބަލިތައް އަލުން ފެނުމުގެ ފުރުސަތު ބޮޑުވުމަކީ އެޗްޕީއޭގެ ކަންބޮޑުވުމެކެވެ.