އެމެރިކާއާ އެކު އެއްބަސްވުމެއް ނުހަދާނަން: އީރާން

އީރާނުގެ ރައްޔިތުންގެ ހައްގުތައް ކަށަވަރުނުވާ އެއްވެސް އެއްބަސްވުމެއްގައި އެމެރިކާއާ އެކު ސޮއި ނުކުރާނެ ކަމަށް އީރާނުގެ އިސް ވެރިޔާ މުހައްމަދު ބާގިރު ގާލީބާފް ވިދާޅުވެއްޖެ އެވެ. އޭނާ ވިދާޅުވީ، އީރާނުގެ މަޝްވަރާ ޓީމުން "ދުޝްމަނުންގެ ބަސްތަކަކަށް ވެސް އަދި އެމީހުންގެ ވައުދުތަކަކަށް ވެސް އިތުބާރެއް ނުކުރާނެ" ކަމަށެވެ. އެމެރިކާއާ އެކު ވެވޭ ކޮންމެ އެއްބަސްވުމެއްގެ ދަށުންވެސް، އީރާނަށް ދަތިކުރުމުގެ ފިޔަވަޅުތަކުން ލުއި ލިބުމާއި، ބޭރުގެ ބޭންކުތަކުގައި ހިފަހައްޓާފައިވާ އެ ގައުމުގެ ފައިސާ ދޫކޮށްލުމަކީ ކަށަވަރުކުރަންޖެހޭ މައިގަނޑު ހައްގުތަކެއްގެ ގޮތުގައި އީރާނުން ދެކެ އެވެ.