އެމެރިކާގެ ހަމަލާތަކުން އީރާނާ އެކު އެއްބަސްވުމުގެ އުންމީދު ފަނޑުވެއްޖެ

އެމެރިކާ އާއި އީރާނާ ދެމެދު ސުލްހައިގެ އެއްބަސްވުމެއް ހަދަން ކުރަމުން އަންނަ މަސައްކަތުގައި ކުރިއެރުންތައް ލިބި އުންމީދު ބޮޑުވެފައި ވަނިކޮށް އެމެރިކާއިން އީރާނަށް އަލުން ހަމަލާ ދިނުމުން ސުވާލުތައް ގިނަވެއްޖެ އެވެ. އެމެރިކާގެ ސެންޓްރަލް ކޮމާންޑުން ބުނި ގޮތުގައި، ހޯމަ ދުވަހު އެމެރިކާގެ ސިފައިން ވަނީ އީރާނުގެ ދެކުނު ސަރަހައްދުގައި ހުރި މިސައިލް ސައިޓްތަކަށާއި، ކަނޑުގެ ސަރަހައްދުގައި މައިނު އަޅަން އުޅުނު އުޅަނދުތަކަކަށް ހަމަލާދީފަ އެވެ. މި ހަމަލާތަކުގެ ސަބަބުން، މިހާރު އޮތް ހަމަލާތައް މެދުކަނޑާލުމުގެ އެއްބަސްވުމާ މެދު ސުވާލު އުފެދި އަދި ދާއިމީ އެއްބަސްވުމަކަށް ކުރާ އުންމީދު ފަނޑުވި ނަމަވެސް އީރާނާ އެކު އެއްބަސްވުމަކަށް އާދެވުމުގެ ފުރުސަތު އަދިވެސް އެބައޮތް ކަމަށް އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވަނީ ވިދާޅުވެފަ އެވެ.