އިސްލާމީ އުންމަތަށް ނަޞްރެއް ލިބޭނީ އެކަތިގަނޑަކަށް ވެގެން

މިއަދުގެ ހުކުރު ޚުތުބާގައި ބުނެފައިވަނީ އިސްލާމީ އުންމަތަށް ކުރިމަތިވެފައިވާ ގޮންޖެހުންތަކުން އަރައިގަނެ، ނަޞްރާއި ފަތަޙަ ލިބޭނީ މުޅި އުންމަތް އެކަތިގަނޑަކަށް ވެގެން ކަމަށެވެ. ޚުތުބާގައި އިސްލާމީ އަޚުވަންތަކަމާއި، ޒަކާތުގެ މުހިންމުކަމާއި، ޒުވާނުންގެ ދައުރާ ގުޅޭގޮތުން ނަސޭހަތްތަކެއް ދީފައިވެއެވެ. އަދި ބައިބައިވުމަކީ އުންމަތް ބަލިކަށިވާނެ ކަމެއްކަން ހަނދާންކޮށްދީ، މުޞީބާތްތަކުގެ ކުރިމަތީގައި ކެތްތެރިކަމާއި ޙިކުމަތްތެރިކަން އިސްކުރުމަށް ގޮވާލާފައިވެއެވެ. އިސްލާމީ ޙަޟާރަތު އަލުން އިޢާދަކުރުމަށްޓަކައި ޒުވާން ޖީލު އިޚުލާޞްތެރި ޢަޒުމަކާއެކު ތެދުވަންޖެހޭ ކަމަށާއި، ޢިލްމާއި ފަންނިއްޔާތުގެ ގޮތުން ކުރިއަރައިދިއުމަކީ މުސްލިމުންނަށް ޢިއްޒަތާއި ޝަރަފު ލިބޭނެ މަގުކަމަށް ވެސް ބުނެފައިވެއެވެ.