ރަމަޟާން މަހުގެ ބޮޑެތި ނަޞްރުތަކާއި ކާމިޔާބީތައް

މިއަދުގެ ހުކުރު ޚުތުބާގައި ހަނދާންކޮށްދިނީ ރަމަޟާން މަހަކީ ނަފުސުގެ ޖިހާދާއި އިސްލާމްދީނުގެ ދުޝްމަނުންގެ މައްޗަށް ބޮޑެތި ނަޞްރުތަކެއް މުސްލިމުން ހޯދި ޖިހާދުގެ މައްސަރުކަމަށެވެ. ރޯދަވެރިޔާ އޭނާގެ ކުރިމަތީގައި ހަލާލު ތަކެތި ހުރި ނަމަވެސް، އެކަލާނގެ އަމުރުފުޅަށް ބޯލަނބައި އެ ތަކެއްޗާ ދުރުހެލިވުމަކީ ކެތްތެރިކަމުގެ އެންމެ މަތީ ދަރަޖަ ކަމަށާއި، މިއީ މުޅި އަހަރު ދުވަހު ފާފަތަކުން ދުރުހެލިވުމަށް ލިބޭ މަތިވެރި ތަމްރީނެއް ކަމަށް ޚުތުބާގައި ފާހަގަކުރިއެވެ. އިސްލާމީ ތާރީޚުގައި ހިނގާފައިވާ އެންމެ ބޮޑެތި ފަތަޙަތަކާއި ކުރިމަތިލުންތައް ހިނގާފައިވަނީ ވެސް ރަމަޟާން މަހުގައި ކަމަށާއި، އެގޮތުން ބަދުރު ހަނގުރާމައާއި މައްކާ ފަތަޙަވުން ފަދަ ކާމިޔާބީތަކެއް ފާހަގަކުރިއެވެ.