ރޯދައަށް ތިބޭއިރު ފަތުރުވެރިންނަށް ކާންދިނުން ހުއްދައެއް ނޫން

މިއަދުގެ ހުކުރު ޚުޠުބާގައި ބުނެފައިވަނީ ރަމަޟާން މަހުގެ މަތިވެރިކަން ހިފެހެއްޓުމުގެ ގޮތުން، މީހުން ދިރިއުޅޭ ރަށްރަށުގައި ހުންނަ ރެސްޓޯރެންޓު ފަދަ ތަންތަނުން އާންމުންގެ ކުރިމަތީގައި ފަތުރުވެރިންނަށް ކެއިންބުއިމުގެ ޚިދުމަތް ދިނުމަކީ ހުއްދަ ކަމެއް ނޫން ކަމަށެވެ. ހާމަކަން ބޮޑު ގޮތުގައި ރޯދަމަހުގެ ދުވާލު، މީހުން ދިރިއުޅޭ ރަށްތަކުގައި ރެސްޓޯރެންޓު ފަދަ ތަންތަން ހުޅުވައިގެން އާންމުންގެ ކުރިމަތީގައި ކެއިންބުއިމުގެ ޚިދުމަތްދިނުމަކީ ހުއްދަވާނޭކަމެއްނޫނެވެ. މީހުން ދިރިއުޅޭ ރަށްރަށުގައި މިފަދަ ޚިދުމަތެއް ފަތުރުވެރީންނަށް ފޯރުކޮށްދޭ ފަރާތްތަކުން އެ ޚިދުމަތެއް ފޯރުކޮށްދިނުމަށް ޓަކައި ޚާއްޞަ އިންތިޒާމުތަކެއް ހަމަޖެއްސިދާނެއެވެ. އަދި ރޯދައަކީ ފަޖުރުލީއްސުރެ އިރު އޮއްސިއްޖައުމަށް ދާންދެން ކެއިންބުއިމާއި ރޯދަ ގެއްލޭ އެންމެހައި ކަންކަމުން ދުރުހެލިވެ ހުރުން ކަމަށާއި، ދޮގުހެދުމާއި އުރެދުމުގެ ޢަމަލުތަކުން ދުލާއި ގުނަވަންތައް ރައްކާތެރިކުރަން ޖެހޭނެ ކަމަށްވެސް ބުންޏެވެ.