ޣައިރު މުސްލިމުންގެ ޢީދުތަކުގައި ބައިވެރި ނުވުމަށް ގޮވާލައިފި

މިއަދު އިއްވި ހުކުރު ޚުތުބާގައި ވަނީ ޣައިރު މުސްލިމުންގެ ޢީދުތަކާއި މުނާސަބާތަކުގައި ބައިވެރި ނުވުމަށް ގޮވާލާފައެވެ. އިސްލާމީ ޙަޟާރަތު ފެށުނީ ކީރިތި ރަސޫލާ صلى الله عليه وسلم އަށް ވަޙީ ބާވައިލެއްވުމާ ހަމައިން ކަމަށާއި، އިސްލާމީ ޙަޟާރަތުގެ މާނައަކީ އިސްލާމީ ސަޤާފަތާއި، އުސޫލުތަކާއި، ހަމަތަކުގެ މަތީގައި ތިބެ ހޯދައިފައިވާ ކުރިއެރުންތަކެއް ކަމަށް ބުނެފައިވެއެވެ. މުސްލިމުން ދީނާ ދުރުވެ، ޢިލްމާއި ދިރާސާކުރުން ދޫކޮށްލައި، ހަމައެކަނި މާއްދީ ދުނިޔެއަށް ހެއްލުމުން މި އަދު އިސްލާމީ އުންމަތް ވެއްޓިފައިވާ ފުންވަޅުގަނޑަށް ވެއްޓުނީ ކަމަށް ޚުތުބާގައި ފާހަގަކޮށްފައިވެއެވެ. މި ޙާލަތުން އަރައިގަތުމަށް ޤުރްއާނާއި ސުންނަތަށް އެނބުރި ރުޖޫޢަވެ، ޢިލްމު ހޯދުމުގައި މަސައްކަތްކުރުމަށް ގޮވާލިއެވެ.