ޓްރެފިކް ގަވާއިދު ތަކާ އެއްގޮތަށް ޢަމަލު ކުރުމަކީ ވާޖިބެއް: ޚުތުބާ

މިއަދުގެ ހުކުރު ޚުތުބާގައި ބުނެފައިވަނީ ދަތުރުފަތުރުގެ ސަލާމަތާއި ރައްކާތެރިކަމަށް ޓްރެފިކް ގަވާއިދުތަކާ އެއްގޮތަށް ޢަމަލުކުރުމަކީ ވާޖިބެއްކަމަށެވެ. އެއްގަމާއި ކަނޑާއި ވައިގެ ދަތުރުތަކުގައި ވިސްނުންތެރިކަމާއެކު ލޮލުގެ ބޭނުން ހިފާންޖެހޭ ކަމަށާއި، އުޅަނދު ދުއްވާ މީހުންނާއި މަގު ހިނގާ މީހުންނާއި މަގުގެ ބޭނުންކުރާ އެންމެހާ ފަރާތްތަކުން މަގުމަތީގެ އަދަބުތަކާއި ޙައްޤުތަކަށް ރައްކާތެރިވާންޖެހޭނެ ކަމަށް ޚުތުބާގައި ބުންޏެވެ. މި ޒަމާނުގައި ހަދާފައި ހުރި ޓުރެފިކް ޤަވާއިދުތަކާއި އުޞޫލުތަކަކީ އިސްލާމީ ޝަރީޢަތާ ތަޢާރުޟުވާ އެއްޗެއް ނޫން ކަމަށާއި، އެއާ އެއްގޮތަށް ޢަމަލުކުރުމަކީ ވާޖިބެއްކަމަށް ޚުތުބާގައި ވަނީ ބަޔާންކޮށްފައެވެ. މަގުމަތީގައި ނުރައްކާތެރި ހާދިސާތައް އެންމެ ގިނައިން ހިނގަނީ އުޅަނދުފަހަރު ދުއްވާ މީހުން ޤަވާއިދާ ޚިލާފުވެގެން ކަމަށާއި، އެހެންކަމުން ޚުތުބާގައި ވަނީ ގަވާއިދު ތަކަށް އިލްތިމާސްކޮށްފައެވެ.