ނަމާދު ޚުޝޫޢަތްތެރިކަމާ އެކު އަދާކުރުމުގެ މުހިންމުކަން

މިއަދުގެ ހުކުރު ޚުތުބާގައި ބުނެފައިވަނީ ދުނިޔެއާއި އާޚިރަތުގެ ކާމިޔާބީއަށްޓަކައި ނަމާދު ޚުޝޫޢަތްތެރިކަމާއެކު އަދާކުރުމުގެ މުހިންމުކަމެވެ. ނަމާދުގައި ޚުޝޫޢަތްތެރިވެ ބިރުވެތިވާ މީހުންނަށް ކާމިޔާބު ލިބޭނެ ކަމަށާއި، އެއާނުލައި އެހެނިހެން ޢަމަލުތައް ޤަބޫލުވެވިގެންނުވާނޭ ކަމަށް ޚުތުބާގައި ފާހަގަކޮށްފައިވެއެވެ. ނަމާދުގައި ޚުޝޫޢަތްތެރިކަމާއި މަޑުމޮޅިކަމާއި މަޑުމައިތިރިކަމެއް ނެތި ނަމާދުކުރާ މީހުންނަށް ނަމާދުގެ ސަވާބުން ކިހައި މިންވަރެއް ލިބޭނެކަމާ މެދު ވިސްނާލުމަށް ޚުތުބާގައި އިލްތިމާސްކުރެއްވިއެވެ. ނަމާދުގައި ޚުޝޫޢަތްތެރިވުމަކީ ވަރަށް މުހިންމު ކަމެއް ކަމަށާއި، އެއީ ތިމާއަށް ވަގުތެއް ވީމާ ކޮށްލައި އުޅޭ ކަމަކަށް ނުހަދައި، އެ އަޅުކަމަށް ވަގުތު ހުސްކޮށްގެން ކުރާހިތުން ގަޔާވެގެން އޭގެ ވަގުތުގައި އަދާކުރާ އަޅުކަމަކަށް ހެދުމަށް ޚުތުބާގައި އިރުޝާދު ދެއްވިއެވެ.