ޢިލްމުވެރިން ވަޒީރުއާ ބައްދަލުކޮށް މަޝްވަރާކޮށްފި

ޢިލްމުވެރިންގެ ގުޅުމުން ކުޅިވަރާއި ހަށިހެޔޮކަމާ ބެހޭ ވަޒީރު އަބްދުﷲ ރާފިއުއާ ބައްދަލުކޮށް މުހިންމު މަޝްވަރާތަކެއް ކޮށްފި އެވެ. މި ބައްދަލުވުމުގައި ނަމާދު ގަޑިތަކާ ދިމާކޮށް ބޭއްވޭ ކުޅިވަރު މުބާރާތްތަކުގެ މައްސަލަ އާއި ދަން ގަޑިތަކުގައި ކުރިއަށް ގެންދެވޭ ކުޅިވަރު މުބާރާތްތަކުގެ ސަބަބުން ކިޔަވާކުދިންނާއި އުމުރުން ދުވަސްވީ މީހުންނާއި އާންމުންނަށް ކުރިމަތިވާ ދަތިތަކާއި ހުކުރު ވަގުތަށް ކުޅިވަރު މައިދާންތައް ބަންދުކުރުމުގެ މުހިންމުކަން ފާހަގަކޮށް މަޝްވަރާ ކުރެވުނެވެ. އަދި ކުޅިވަރު މައިދާންތަކުގައި ވުޟޫކޮށް ނަމާދު ކުރެވޭނެ ގޮތްތައް ހެދުމާއި، އެތަންތަނުގައި ވެސް ދީނީ ޝިއާރު އާލާކޮށް، ހޭލުންތެރިކަން އުފެއްދުމަށް ތަފާތު ވަސީލަތްތައް ބޭނުންކުރުން ފަދަ ކަންކަން ވެސް ހިމެނެ އެވެ. މީގެ އިތުރުން ޔޯގާ މައްސަލަ އާއި ކުޅިވަރަށް ބޭނުންވާ އުސޫލުތައް ދީނީ އިމުގެ ތެރެއިން އެކުލަވައިލުމުގެ މައްޗަށް ވެސް މި ބައްދަލުވުމުގައި ވަރަށް ތަފްސީލީ ގޮތެއްގައި މަޝްވަރާ ކުރެވުނު ކަމަށްވެސް އެ ގުޅުމުން ބުންޏެވެ.